Çerx fîlmekî tirsê an erotîk e?

0
14
REKLAM    

Navê fîlm “Çerx” e. Mijara wî ya sereke, tolhilanîna jineke kurd e ku nagihîje mirazê xwe û tê kuştin. Piştî tê kuştin, bi giyanî li jiyanê vedigere û tola xwe ji bav û bira û hezkirinê xwe distîne. Zimanê fîlm bi kurdî û almanî ye û Chepo Gewez hem derhêner e, hem senaryo nivîsandiye û hem jî di fîlm de dileyîze. Gewez fîlmê xwe weke yekem fîlmê kurdî yê erotîk, lê weke fîlmekî tirs-xofê binav dike û bi ser de jî dibêje,

“Di fîlm de hinek sahneyên erotîk jî hene.” Di fîlmê Çerx de du karakterên sereke yên jin hene, lê leystikvan ne Kurd in.

Film havîna îsal, li bajarê Freiburg a Almanyayê hatiye kişandin û wek ku derhêner ragehand fîlm di meha Mijdarê de wê di çerçoveya Festîvala Fîlmên Kurdî ya Berlinê de were ravîdan.

Nivîskarê kurd Mîr Qasimlo, Rindo Sur, Lena Nowak û Maria Ro di fîlm de dileyîzin; yek ji leystikvanan, nivîskar Mîr Qasimlo dibêje, “Rolekî min a ku hemû sahneyên filmê dagir bike, tune ye. Dilê min tune bû ez bilîstama lê ji ber dostaniyeke dirêj ya min û derhêner hebû, min daxwaza wî neşikand û ez di du sahneyan de leyîstim.”

Li gor dîtina Mîr Qasimlo ev fîlm ji aliyê bêtirsî, bezandina sînorên civakî yên tên zanîn û ji aliyê wênekirina hezkirin û kîna di mirov de heye û bêguman bicihdana sahneyên seksê, ji filmên din cudatir e û xwediyê nasnameyeke taybet e. Qasimlo derbarê nasnameya fîlm de berovajî derhêner difikire: “Erê mirov dikare bêje ku ew yekem fîlmê kurd yê erotîk e, ligel hêlên din wek tirs û xof û destnîşankirina kuştina jinan ya ji ber namûsê.”

Me derbarê mijar, kişandin û dahatûya fîlmê bi navê Çerx de, bi derhênerê fîlm Chepo Gewez re hevpeyvînek çêkir.

We çawa dest bi nivîsandin û kişandine fîlmek wiha kir?

Ez ji sînemayê pir hez dikim, ez wekî din ji wênekişandinê û vegotina çîrokan hez dikim. Lewma min pir çîrok û pexşan bi almanî, herwiha bi kurdî nivîsandin. Rojek min ji xwe re got ka ez çima ji hemû cîrokên ku min nivîsandine, fîlmekî kurt an metrajdirêj Wiha min dest bi vê projeyê kir.

Ango tiştek bi we re hebû ku we dixwest bi zimanê sînemayê vebêjin…

Belê; biryara li ser vegotina bi amarên sînemayê, ango vegotina bi dîmenan li cihekî din ji bo min bû wek gerîna zimanê zikmakî. Min hertim digot ku tişteke min heye divê ez vebêjim, lê min nizanîbû ka ez van tiştan çawa vebêjim. Ev yek gelek ciwanên kurd ji xwe dipirsin, gelek ji wan xwediyê heman pirsgirêkê ne. Bi hemûyan re çîrok û serpêhatiyên balkês hene, di jiyana hemûyan de trajedî û windakirin hene, gelek ji wan xemgîn in, lê nizanin ka van serpêhatiyan çawa pêşkêş bikin.

We çawa vê hêzê bi xwe re dît ku hûn dest bi projeya fîlm bikin?

Bi xêr û hilbijartina ziman re min ev hêz di xwe de dît. Dema ku mirov ligel serpêhatiyekê, zimanekî rasteqîn hilbijêre ev kar digîhe endama xwe; lê ji ber ku gelek kes ji bo berhema xwe ya hunerî ew zimanê rasteqîn nabînin, nikarin gav bavêjin, di nava fikir, raman û xeyalan de dimînin û paş ve diçin. Divê serpêhati têkeve nava peyvan, ji wir jî derbasî wêneyan û dimenan bibe. Ev e yekem rêçika rast ya ku pêdiviya me pê heye.

Em werin ser mijara nasnameya fîlm. Çerx çi ye û behsa çi dike?

Beriya her tiştî dixwazim bêjim ku ez pir ji fîlmên horror ango fîlmên bi tirs hezdikim; min hertim xeyal kiriye ku rojekê ez fîlmekî wiha bikişînim. Yekemîn gava min ew bû ku min çîrokek ji bo fîlm dît. Min di nava gelek mijaran de lêkolîn kir, ez li mijarek hem aktuel û hem jî potansiyel digeriyam. Min mijarê dît: Tûndiya li dijî jinan û xwekuştin an jî kuştina jinan.

Baş e, mijara ku we ji bo fîlm hilbijart, ji bûyerên rastîn tê, an fîktion e?

Wisa xuya dike ku ku mijar hemû rastîn e. Jiber ku tûndiya li dijî jinan niha fenomeneke rojane ye. Paşê min mijara fîlm, ango çîroka fîlm bi mantiqeke trajîk xemiland, lê zêde kirin, û di dawiyê de wisa tiştek jê derket ku ne diyer e gelo ka çîrok rastîn e an fiktion e. Ango min ev herdu tistan bi zanatî tevlî hev kirin.

Ji bilî nivîsandina çîrokê we çi kir?

Min senaryo nivîsand, derhêneriya fîlm kir û ez tê de leyîstim jî.

Weke em jê agahdar bûne, Çerx yekem fîlmê erotîk yê bi kurdî ye, lê hûn behsa horrorê dikin…

Naxêr, Çerx ne yekem fîlmê kurdî yê erotîk e, fîlmekî horror e lê te de hinek sahneyên erotîk hene. Mirov dikare bêje ku yekem fîlmê kurdî ye ku tê de wiha sahneyên erotik hene.

Ti kes an jî ti saziyek pistgirî dane we di aliyê aborî de? Ango sponsor û produktorê fîlm kî ne?

Ligel ku em di nava karsazên kurd de pir li sponsor û alîkariyê geriyan, lê mixabin ti kesî alîkarî neda me. Tişta ku me dît bêbaweriyeke mezin hebû ji bo me û ji bo hunerê. Tenê birayê min û hevalekî min alîkariyeke biçûk dane me. Tenê ew herdu prodokturê me ne.

Di fîlm de du karakterên jin hene, lê ne jinên kurd in. Gelo we jinên kurd ji bo fîlmê xwe nedît an hûn li wan negeriyan?

Min pir dixwest ku ez di vê projeyê de jin û keçên kurd bibînim. Lê mixabin me nekarî. Yên ku min daxwaz ji wan kir, nekarîbûn bi serê xwe biryarê bidin, min jî nexwest ku malbatên wan ji wan re pirsgirêkan derxînin, lewma min zêde israr nekir. Di dawî de me du jinên ne kurd dîtin.

Niha fîlm di kîjan astê de ye? Em ê kengê karibin temaşe bikin?

Fîlm bi giştî qediya, û wê di demeke nêzîk de li Berlînê wê tevlî Ferstîvala Fîlmên Kurdî bibe. Ez nizanim ka wê temaşevan fîlmê min çawa bibînin û binirxînin. Me karê temaşevanan jî zehmet kiriye, ji ber ku em çendîn dîmenên bi cesaret nîşanê wan didin û wan rastî surprîzekê tînin. Ez ji niha de bi heyecan im.

Reklam

ŞIROVE BIKE

Ji kerema xwe re şîrove bike!
Ji kerema xwe navê xwe binivîse